بنات اخر زمن... بتدور على عريس معاه فلوس .. ومش مهم يكون قد أبوها ؟؟
البنات زمان _ على ما كنا نسمع _ كانت بتحلم بفارس أبيض يخطفها على حصان_ أبيض برضه ! ..ويطير بيها , ولما الناس دخلت القرن العشرين , البنات بقت بتحلم بشاب تقعد جنبه فى الكوشة, وتتمخطر معاه زى اى حلوة زينة ...
النهاردة فى سنة 2007 الحلم بقي أن شايب ييجى ياخذها فى عربية مرسيدس, ويطير بيها على شقة فخمة .
البنات اللى بتفكر بالاسلوب ده مش بنات جاهلة أو تعليمها على قدها لا بالعكس ده بنات الجامعة أكتر بنات بيفكروا بالاسلوب ده, وأغلبيتهم بيفضلوا أساتذة الجامعة اللى عمره غالبا ما بيكون من 40 الى 50 سنة .
يعنى يكون دكتور ملو هدومه ومركزه ,. وعملهم من زمان , ومش مهم طبعا اذا كان متجوز ومخلف عيال قدها .
من ناحية تانية بيكون فى مرحلة حرجة من حياته اما يتغلب عليها أو يستسلم ليها وهى (مرحلة المراهقة المتاخرة) وللاسف أن معظم الرجالة بتستسلم للمرحلة دى وبتعيشها بكل تطوراتها .
واستاذ الجامعة من أول الرجال اللى بيعيشوا المرحلة دى بالرغم من ثقافته وعقليته المتفتحه , لكنه فى الاول وفى الاخر راجل ولانه غالبا قضى شبابه كله فى المذاكرة والدراسة المستمرة طوال الوقت حتى لما اتجوز اتجوز جواز صالونات يعنى غالبا حياته كلها مقفلة على الاخر .
وتلاقى البنت على طول بتلعب على الوتر ده وتوقع الراجل بكل سهولة , علشان هو يطول واحدة صغيرة .. وغالبا بتكون زى القمر تيجى تقوله انا بحبك وترضى تتجوزه حتى وان كان على ضرة .
للاسباب اللى بتدفع بعض البنات تفكر بالاسلوب ده كتيرا مثلا لما تكون البنت فقيرة وعلى قد حالها فتفكر تاخد واحد يعوضها عن الفقر ده , أو تكون متوسطة الحال بس طموحاتها كبيرة عايزة تعيش فى مستوى اجتماعى عالى أوى ولان ماعندهاش وقت تكافح مع واحد من سنها فتقول لنفسها هو أنا لسه هستنى طب ما اخذ واحد جاهز من كله .
البنت مننا تقول لنفسها ان شباب اليومين دول مستهترين ما بيعرفوش معنى المسئولية البيت والعيال ومش بعيد أطلق بعد شهرين من جوازى وأرجعلهم بعيل طب ليه ما أنا اخد واحد كبير عنى فى السن عنده خبرة وعاقل .
بنت تانية تقول أنا هفضل مستنية كتير فى بيت أهلى لحد ما اعنس , طب ليه ماله الكبير فى السن .
وكمان من ضمن الاسباب اللى بتخلى البنات تتجه للجواز من يكبرهن فى السن هو احسا سهن بفقدان المثل والقدورة الحسنة ,. ويتمثل المثل الاعلى عند أى بنت فينا فى والدها وغالبا أن معظم البنات دول بيعانوا من غياب الاب وفقدانه .
ومن ضمن الحالات اللى كان ليها التجربة دى : م.س .
ولما سالتها عن سبب تزوجها من أستاذ الجامعة اللى كانت هى تليمذته ؟
قالت بصراحة أنا لقيت فيه الحنان والاحتواء والمثل القدوة اللى مالقتهمش فى أى مكان تانى أو مع أى حد تانى .
وبالنسبة لفرق السن الكبير اللى ما بينا قدرات عليه بالرغم انه أكبر منى ب30 سنة وكمان كان متجوز وعنده عيال قدى بس قدرت اتكيف مع ده بكل سهولة .
وفى الحالة التانية حالة : س. ع :
اللى وافقت تتجوز واحد جاهل وكبير عنها فى السن بكتير وكمان متجوز ومخلف وبالرغم من كل ده وافقت علشان شبح العنوسة اللى كان مستنيها .
ولانة كمان معاه فلوس كتير وكانت فاكرة انه هيعيشها فى سعادة ولكن للاسف حياتها بعد كده كانت عذاب على الاخر .
يارب يكون الموضوع عجابكم
موضوع: بنات اخر زمن ...!!! 
الثلاثاء ديسمبر 11, 2007 11:50 am
